महाराष्ट्राची कुलस्वामिनी आई तुळजाभवानी मातेच्या पदस्पर्शाने पुनीत झालेल्या या पावन नगरीत तिच्याच नावाने सुरू असलेल्या, तुळजापूर शहराच्या उत्तरेला, बालाघाटाच्या पर्वत रांगावर भव्य व टुमदार, नयनरम्य अशी शाळेची भव्य व सुंदर इमारत आपणा सर्वांचे लक्ष वेधून घेते! हेच ते श्री तुळजाभवानी सैनिकी माध्यमिक व उच्च माध्यमिक विद्यालय, तुळजापूर. महाराष्ट्र शासनाच्या शैक्षणिक धोरणानुसार प्रत्येक जिल्ह्यात एक सैनिकी शाळा या धोरणानुसार 15 ऑगस्ट 1996 रोजी उस्मानाबाद जिल्ह्यासाठी श्री तुळजाभवानी मंदिर संस्थान, तुळजापूर संचलित, श्री तुळजाभवानी सैनिकी विद्यालय तुळजापूरची स्थापना करण्यात आली. त्याचबरोबर सन 2008-09 मध्ये विद्यालयाला विशेष आदिवासी तुकडी सुरू करण्याची मान्यता प्राप्त झाली. आज रोजी विद्यालयात इयत्ता सहावी ते बारावी पर्यंतच्या बारा तुकड्या असून त्यामध्ये 530 विद्यार्थी ज्ञानार्जन करीत आहेत,व 18 शिक्षक हे ज्ञानदानाचे कार्य करीत आहेत. हे विद्यालय निवासी असून या ठिकाणी विद्यार्थ्यांच्या निवासासाठी भव्य व सुसज्ज असे वस्तीगृह व भोजन कक्ष बांधण्यात आले आहे.